काठमाडौं । प्रधानमन्त्री तथा नेकपा (एमाले)का अध्यक्ष केपी शर्मा ओलीले आफूले निर्वाचनमा अहिलेसम्म कुनै पनि अमर्यादित, अपारदर्शी वा गैरकानुनी क्रियाकलाप नगरेको स्पष्ट दाबी गरेका छन्।
आइतबार बालुवाटारस्थित आफ्नै सरकारी निवासमा आयोजित एक पुस्तक लोकार्पण कार्यक्रममा सम्बोधन गर्दै प्रधानमन्त्री ओलीले विगतदेखि वर्तमानसम्मको निर्वाचन यात्रालाई स्मरण गर्दै आफूले शुद्ध, पारदर्शी र मर्यादित ढंगले निर्वाचन लड्दै आएको बताए।
कार्यक्रममा सहभागीहरूले नेपालको निर्वाचन प्रणाली महँगो हुँदै गइरहेको, कालोधन प्रयोग हुने गरेको लगायत विषय उठाएपछि जवाफस्वरूप प्रधानमन्त्री ओलीले ०४८ सालको संसदीय निर्वाचनको प्रसंग सुनाए।
“त्यो बेलामा पार्टीका महासचिव माधवकुमार नेपालले बाटो खर्चका लागि २ सय रुपैयाँ दिनुभयो। म १ सय ८० रुपैयाँमा झापा गएको थिएँ, २० रुपैयाँ जोगिएको थियो। एक साथीले खानाको पैसा पनि तिरिदिए। त्यो २० रुपैयाँ चुनावपछि साथीहरूसँग चिया खाएर खर्च गरियो,” ओलीले स्मरण गरे।
प्रधानमन्त्री ओलीका अनुसार ०४८ सालको निर्वाचनमा उनका समर्थकहरूले ४३ हजार रुपैयाँ संकलन गरेका थिए। त्यसमध्ये २१ हजार निर्वाचनमा खर्च भयो भने बाँकी पैसा कार्यकर्ताको उपचार र पार्टी कोषमा बचत गरिएको उनले बताए।
ओलीले थपे, “नेपालमा दुईवटा आम निर्वाचनमा सर्वाधिक मत ल्याएर जित्ने व्यक्ति म हुँ। म कसैलाई धम्की नदिएर, बुथ कब्जा नगरी, कुनै अपफियर गतिविधि नगरी जनताको भोटबाट जितेको हुँ।”
उनले निर्वाचनमा पैसा, पावर वा प्रभावको प्रयोग बिना पनि चुनाव जित्न सकिने उदाहरण आफू भएको जिकिर गरे।
“यदि म कसैलाई धम्की दिएको, नियम उल्लंघन गरेको, बुथ कब्जा गरेको प्रमाण देखाउन सक्छ भने म जिम्मेवारी लिन तयार छु,” प्रधानमन्त्री ओलीले भने, “रिसको आवेगमा गाली गर्न पाइन्छ, तर प्रमाणसहित कुरा गर्नुहोस्।”
उनको यो अभिव्यक्तिलाई आगामी निर्वाचन प्रक्रिया र राजनीतिक शुद्धता सम्बन्धी बहसमा नयाँ चासोको विषयको रूपमा लिइएको छ।
