काठमाडौं । विकास हाइड्रोपावर कम्पनी लिमिटेडले सर्वसाधारणका लागि निष्कासन गरेको साधारण शेयर (आईपीओ) को बाँडफाँट आज सम्पन्न भएको छ। बिक्री प्रबन्धक प्रभु क्यापिटल लिमिटेडको कार्यालयमा आज बिहान साढे ९ बजे गोलाप्रथामार्फत बाँडफाँट प्रक्रिया सम्पन्न गरिएको हो।
कम्पनीको आईपीओमा मागभन्दा धेरै आवेदन परेपछि नियमानुसार लकी ड्रका आधारमा बाँडफाँट गरिएको हो। यस क्रममा २ लाख ९४ हजार २७६ जना भाग्यमानी आवेदकले १० कित्ताका दरले शेयर पाएका छन्। तर, १८ लाखभन्दा बढी आवेदक भने यसपटक पनि निराश भएका छन्।
प्रभु क्यापिटलका अनुसार कुल २१ लाख २० हजार ८७५ जनाले आवेदन दिएका थिए। उनीहरूले कूल २ करोड ५६ लाख २७ हजार ११० कित्ता शेयरका लागि आवेदन दिएका थिए। यस्तै, दोहोरो (डुब्लिकेट) आवेदन दिएका १२ हजारभन्दा बढीको आवेदन रद्द गरिएको क्यापिटलले जनाएको छ।
कम्पनीले असार १८ गतेदेखि २२ गतेसम्म सर्वसाधारणका लागि २९ लाख ४२ हजार ७६० कित्ता शेयर निष्कासन गरेको थियो। शेयरमा अत्यधिक चासो देखिएको कारण यसपटक पनि सीमित आवेदकले मात्र शेयर प्राप्त गर्न सकेका छन्।
