काठमाडौं । चिनको कुनमिङबाट काठमाडौं आउने चाइना इस्टर्न एयरलाइन्स (युनान मयूर लिभरी) को जहाज खराब मौसमका कारण त्रिभुवन अन्तर्राष्ट्रिय विमानस्थलमा अवतरण गर्न नसकी बङ्गलादेशको राजधानी ढाका अवतरण गर्न बाध्य भएको छ।
काठमाडौं उपत्यकामा लगातार खराब मौसम रहेकोले जहाजलाई सुरक्षित अवतरण गराउन कठिनाइ भएको थियो। केही समय जहाज काठमाडौँको आकाशमा फन्का लगाएर प्रतीक्षा गरिरहेपछि अन्ततः नियन्त्रण कक्षले वैकल्पिक गन्तव्यका रूपमा ढाकामा अवतरण गर्न निर्देशन दिएको थियो।
यस घटनाले यात्रुहरूलाई असहजता भए पनि सुरक्षा प्राथमिकतामा राख्दै वैकल्पिक व्यवस्थापन गरिएको जनाइएको छ। मौसममा सुधार भएपछि जहाज काठमाडौँका लागि पुनः उडान भर्ने तयारी गरिरहेको बताइएको छ।
