काठमाडौं । नेकपा माओवादी केन्द्रका सांसद सुदन किराँतीले लामो समयदेखि कानुन नबनिएको भन्दै हतारमा त्रुटिपूर्ण कानुन निर्माण नगर्न चेतावनी दिएका छन् ।
शुक्रबार बसेको प्रतिनिधिसभाको अन्तर्राष्ट्रिय सम्बन्ध तथा पर्यटन समितिको बैठकमा बोल्दै उनले “१२ वर्षदेखि कानून बनेको छैन भनेर अब हतारमा गलत कानुन बनाउनु हुँदैन” भन्ने धारणा राखेका हुन् ।
समितिमा छलफल भइरहेको नेपाल नागरिक उड्डयन प्राधिकरण विधेयक, २०८१ सम्बन्धमा बोल्दै सांसद किराँतीले उक्त विधेयक नेपाल नागरिक उड्डयन क्षेत्रको सुधार र अन्तर्राष्ट्रिय विश्वास पुनःस्थापनाका लागि अत्यन्तै महत्वपूर्ण रहेको बताए ।
उनले नेपाल अझै युरोपियन युनियन (EU) को कालोसूचीमा रहेको उल्लेख गर्दै यसको प्रत्यक्ष असर नेपाल वायुसेवा निगममाथि परेको बताए ।
“नेपाल वायुसेवा निगममात्रै रोकिएको हो, अन्य निजी वायुसेवा कम्पनीसँग अन्तर्राष्ट्रिय उडानका लागि जहाज नै छैन,” उनले भने, “त्यसैले यसले अन्तर्राष्ट्रिय रूपमा नेपाल काम नगर्ने, सुधार नगर्ने देश हो भन्ने नकारात्मक सन्देश दिइरहेको छ ।”
उनले अन्तर्राष्ट्रिय उड्डयन क्षेत्रमा नेपालको छवि सुधार गर्न आवश्यक विधेयक पारित गर्नु पर्नेमा जोड दिँदै, तर त्यसका लागि गहिरो छलफल र स्पष्टता आवश्यक रहेको बताए ।
सांसद किराँतीले विधेयकको उद्देश्य र कार्यान्वयन पक्ष स्पष्ट नहुँदा फेरि पनि सुधारभन्दा समस्यामै देश अल्झिने खतरा रहेको भन्दै सबै सांसदहरू गम्भीर भएर छलफलमा जुट्नुपर्ने आवश्यकता औँल्याए ।
