विद्यालय शिक्षा विधेयकमाथिको छलफल अनिश्चितकालका लागि स्थगित

काठमाडौं । प्रतिनिधिसभाको शिक्षा, विज्ञान तथा प्रविधि समितिको बैठक शिक्षामन्त्री रघुजी पन्तको आग्रहमा अनिश्चितकालका लागि स्थगित गरिएको छ। आजको बैठकबाट विधेयक टुंगो लगाउने तयारी भए पनि मन्त्री पन्तले थप छलफलका लागि समय मागेका थिए।

समितिका सभापति अम्मरबहादुर थापाले हालसम्मका सहमतिहरू यथावत् राख्दै बैठक अर्को सूचना नआएसम्म स्थगित गरिएको जानकारी दिएका छन्।

शिक्षामन्त्री पन्तले परिस्थिति जटिल बनेको भन्दै सत्ता गठबन्धनसँग थप परामर्श आवश्यक रहेको बताएका छन्। यसअघि उनले कांग्रेस सभापति शेरबहादुर देउवासँग भेटवार्ता गरेका थिए।

यसअघि पूर्वमन्त्री विद्या भट्टराई र सुमना श्रेष्ठले विधेयकमा स्वार्थ समूहको चलखेल रहेको आरोप लगाउँदै आलोचना गरेका छन्।