काठमाडौं । वरिष्ठ गीतकार, गायक तथा साहित्यकार गणेश रसिकको ७८ वर्षको उमेरमा आइतबार निधन भएको छ । ललितपुरस्थित नेपाल क्यान्सर अस्पतालमा उपचारका क्रममा उनको निधन भएको पारिवारिक स्राेतले जानकारी दिएको छ । रसिकको शव हाल टिचिङ अस्पतालमा राखिएको छ । रसिककी छोरी भोलि बेलायतबाट नेपाल फर्किएपछि अन्तिम संस्कार गरिनेछ ।
भोजपुरमा जन्मिएका रसिक लामो समयदेखि प्रोस्टेट क्यान्सरबाट पीडित थिए । उपचारका लागि भारतसमेत गएका उनी अन्तिम चरणको क्यान्सर भएपछि स्वदेश फर्किएका थिए । नेपाली गीत, संगीत र साहित्यमा रसिकको योगदान उल्लेखनीय छ । उनका चर्चित कृतिहरूमा ‘क्षितिजलाई छुन खोज्दा’ (कथासंग्रह, २०२४), ‘एउटा सारंगी छुन खोज्दा’ (२०२७), ‘रसिकका गीतहरू’ (२०४५), ‘आकाशगंगाको ओतमुनि’ (उपन्यास, २०४८), ‘जब सिस्नुहरू टेक्दै हिँडेँ’ (संस्मरण, २०५५), ‘बिलाउँदै गएका गीत’ (२०५८), ‘दशगजामा उभिएर हेर्दा’ (२०६३), ‘स्वाधिनताको पीडा’ (२०६८), र ‘पेरुङ्गो संस्करण’ (२०७३) आदि पर्छन् ।
उनले रत्न रेकर्डिङ संस्थान (२०३८–२०४०), सांस्कृतिक संस्थान (२०४०–२०४६), साझा प्रकाशन (२०५२–२०५५) तथा नेपाल संगीत तथा नाट्य प्रज्ञा–प्रतिष्ठान (२०७२–२०७५) मा उच्च पदहरूमा रहेर महत्वपूर्ण भूमिका निर्वाह गरेका थिए ।
