काठमाडौं । पछिल्लो समय वन्यजन्तुको आक्रमण बढ्दै गएको छ। आर्थिक वर्ष २०८१/०८२ को श्रावणदेखि मंसिर महिनासम्मको अवधिमा विभिन्न जनावरको आक्रमणबाट ८३ जनाको मृत्यु भएको छ। आक्रमणबाट ५९९ जना घाइते भएका छन् भने २५६ जनालाई उद्धार गरिएको प्रहरीले जानकारी दिएको छ ।
नेपाल प्रहरीका अनुसार, पाँच महिनामा हात्तीको आक्रमणबाट ६ जनाको मृत्यु, १४ जना घाइते, र ३ जनाको उद्धार भएको छ। बाघको आक्रमणमा ३ जनाको मृत्यु, २४ जना घाइते, र ११ जनाको उद्धार भएको छ।
गैँडाको आक्रमणमा ४ जनाको मृत्यु, १४ जना घाइते, र ४ जनाको उद्धार भएको छ भने भालुको आक्रमणमा १५ जना घाइते भएका छन् र २ जनाको उद्धार भएको छ। सर्प दंशका घटनामा सबैभन्दा बढी क्षति भएको छ । जसमा ७० जनाको मृत्यु, ५३२ जना घाइते, र २३६ जनाको उद्धार गरिएको छ।
जनावरको आक्रमण रोक्न तथा उद्धार कार्यका लागि १,८३५ प्रहरी परिचालन गरिएको छ। मानव र जनावरबीचको द्वन्द्व व्यवस्थापनका लागि स्थानीय तह र सरोकारवालाहरूबीच समन्वय गरेर कार्य गर्नुपर्ने आवश्यकता देखिएको छ।
यस अवधिमा जनावरको आक्रमणबाट भएको क्षतिले स्थानीय क्षेत्रका बासिन्दाको जनजीवन असुरक्षित बनेको छ। जनावरको प्राकृतिक बासस्थान संरक्षण तथा मानव-जनावर द्वन्द्व न्यूनीकरणका लागि दीर्घकालीन उपाय अवलम्बन गर्न विज्ञहरूले सुझाव दिएका छन्।
