काठमाडौं। प्रधानमन्त्री सुशीला कार्कीले वैदेशिक रोजगारीलाई सुरक्षित, पारदर्शी र सम्मानजनक बनाउनका साथै निःशुल्क बनाउने नीति आवश्यक रहेको बताएकी छन्। वैदेशिक रोजगार बोर्डको १८औँ स्थापना दिवसका अवसरमा आयोजित कार्यक्रममा उनले रोजगारीबाट फर्किने श्रमिकका परिवारलाई सम्मानजनक एकीकरण र सामाजिक सुरक्षा सुनिश्चित गर्न बोर्डलाई निर्देशन दिइन्।
प्रधानमन्त्री कार्कीले वैदेशिक रोजगारीमा जानेहरूलाई दक्ष बनाउन सीप प्रशिक्षण आवश्यक रहेको उल्लेख गर्दै, विदेशबाट फर्केका श्रमिकको अनुभव, सीप र पुँजी स्वदेशमा उत्पादनमूलक क्षेत्रमा लगानी गर्न प्रोत्साहित गर्ने नीति सरकारले अवलम्बन गरेको जानकारी दिइन्।
उक्त कार्यक्रममा उनले वैदेशिक रोजगारीसँग सम्बन्धित समस्या समाधानका लागि सुरु गरिएको ‘कल सेन्टर’ र ‘टेलिमेडिसिन’ सेवा उपयोगी रहेको भन्दै, सबै कल्याणकारी सेवाहरू अनलाइन प्रणालीमार्फत उपलब्ध गराउने पहल प्रशंसनीय रहेको बताइन्।
प्रधानमन्त्री कार्कीले स्वदेशमै सम्मानजनक रोजगारीका अवसर सिर्जना, सीपमा आधारित उद्यम र पुनः एकीकरण कार्यक्रमहरू विस्तार गर्न प्राथमिकता दिन मन्त्रालयलाई निर्देशन दिएकी छन्।
