काठमाडौं । नेपाल प्रहरीका महानिरीक्षक (आइजीपी) चन्द्रकुवेर खापुङले जेनजी पुस्ताको आन्दोलनका कारण देशले अकल्पनीय क्षति व्यहोर्नुपरेको बताएका छन्।
७०औं प्रहरी दिवस २०८२ का अवसरमा शुक्रबार प्रहरी प्रधान कार्यालय नक्सालमा आयोजित अमर प्रहरीप्रति श्रद्धाञ्जली अर्पण कार्यक्रममा बोल्दै उनले भदौ २३ र २४ गतेको जेनजी पुस्ताको प्रदर्शन तथा त्यसपछिका घटनाक्रमले देशलाई गम्भीर क्षति पुर्याएको बताए।
उनका अनुसार नेपाल प्रहरी आज राज्यको सबैभन्दा अग्रपंक्तिमा सेवारत, विशाल संयन्त्रयुक्त र नागरिकको स्नेह तथा आक्रोश दुबैको सामना गर्न सक्षम संस्थाको रूपमा स्थापित भएको छ।
खापुङले राजनीतिक परिवर्तनको संवेदनशील अवस्थाबीच सुरक्षाका चुनौती बढ्दै गएको बताउँदै, असहज परिस्थिति आए पनि प्रहरी संगठन नागरिकको शान्ति, सुरक्षा र अमन–चयनका लागि प्रतिबद्ध रहेको स्पष्ट पारे।
उनले भने, “नेपाल प्रहरीबिनाको समाजको कल्पना गर्न सकिँदैन। संगठन नागरिक भरोसाको केन्द्रका रूपमा स्थापित छ।”
महानिरीक्षक खापुङका अनुसार हाल देशभर ९३९ स्थानमा नयाँ प्रहरी इकाइको माग र ४०० भन्दा बढी इकाइमा स्तरोन्नतिको माग परेको छ। ती माग पूरा गर्न २५ हजारभन्दा बढी प्रहरी जनशक्ति थप आवश्यक पर्ने उनले बताए।
उनले प्रहरी संगठनभित्रै शुद्धीकरण र सुधार अपरिहार्य रहेको उल्लेख गर्दै प्रहरीको बोली, वचन र व्यवहारमा सुधार ल्याउनुपर्नेमा जोड दिए।
“नागरिकले तिरेको करबाट खरिद गरिएको पोसाक लगाएर नागरिकमाथि अपशब्द र रवाफ प्रदर्शन कहिल्यै स्वीकार्य हुँदैन,” उनले भने।
