काठमाडौं । आईसिसी विश्वकप लिग–२ अन्तर्गत आफ्नो पाँचौँ त्रिकोणात्मक एकदिवसीय शृङ्खलामा नेपाल घरेलु टोली संयुक्त अरब इमिरेट्स (युएई) सँग पाँच विकेटले पराजित भएको छ।
दुबई अन्तर्राष्ट्रिय क्रिकेट मैदानमा आज भएको खेलमा नेपालले टस जितेर ब्याटिङ रोजेको थियो र निर्धारित ५० ओभरमा सबै विकेट गुमाउँदै २३३ रन बनायो। नेपालका लागि कप्तान रोहित पौडेलले १३० बलमा पाँच चौका र दुई छक्काको मद्दतले सर्वाधिक १०९ रन बनाए। अन्य योगदानकर्तामध्ये आसिफ शेख ३५, आरिफ शेख २७, दीपेन्द्रसिंह ऐरी २३ र करण केसी १३ रनमा सीमित भए।
युएईका लागि जाहिद अलीले चार विकेट लिएका थिए भने जुनैद सिद्धिकीले तीन र मोहम्मद रोहिद तथा हैदर अलीले समान एक/एक विकेट लिए।
युएईले नेपालले दिएको २३४ रनको लक्ष्य ४३.३ ओभरमा पाँच विकेट गुमाउँदै पूरा गर्यो। युएईका लागि आर्यन्श शर्माले ९८ बलमा १० चौका र तीन छक्काको मद्दतले सर्वाधिक ९८ रन बनाए। अलिसान सराफुले ४५, मोहम्मद वासिम २६, ध्रुव परासर अविजित १६, कप्तान राहुल चोपारा १५, हर्षित कौशिक १३ र जाहिद अली अविजित ११ रन बनाए।
नेपालका लागि सन्दीप लामिछानेले दुई विकेट लिएका थिए भने करण केसी र दीपेन्द्रसिंह ऐरीले समान एक/एक विकेट लिए।
यस हारसँगै नेपालको लिगमा लगातार दोस्रो पराजय भयो। पहिलो खेलमा नेपाल अमेरिकासँग १०६ रनले पराजित भएको थियो। १८ खेलमा १२ अंक जोडेको नेपाल सातौँ स्थानमा रहँदा, युएई समान खेलबाट आठ अंकका साथ अन्तिम स्थानमा छ।
