काठमाडौं । यमपञ्चकको दोस्रो दिन अर्थात कुकुर तिहारको अवसरमा नेपाल प्रहरी केनाइन कार्यालय महाराजगंजमा सोमबार कुकुर पूजा कार्यक्रम सम्पन्न भएको छ।
कार्यक्रममा नेपाल प्रहरी केनाइन कार्यालयका प्रमुख प्राविधिक प्रहरी उपरीक्षक डा. रामचन्द्र सत्यालले कार्यालयको प्रांगणमा रहेको प्रहरी कुकुरको प्रतिमामा माल्यार्पण गर्नुभएको थियो। साथै कार्यालयमा रहेका विभिन्न जातका कुकुरहरूलाई विशेष पूजा गरिएको थियो।
यस वर्षको सर्वोत्कृष्ट प्रहरी कुकुर ‘घुङ्ग्रु’ र उत्कृष्ट अपराध अनुसन्धान तथा आज भएको दौड प्रतियोगितामा प्रथम स्थान प्राप्त गर्ने प्रहरी कुकुर ‘टाइगर’ लाई कार्यक्रमका दौरान पुरस्कृत गरिएको थियो। साथै उत्कृष्ट कार्य गर्ने प्रहरी कर्मचारीहरूलाई समेत सम्मान गरिएको थियो।
कार्यक्रमको अवसरमा प्रहरी उपरीक्षक सत्यालले नेपाल प्रहरीको केनाइन सेवाले अपराध अनुसन्धान र सुरक्षा कार्यमा खेलेको महत्वपूर्ण भूमिकाको चर्चा गर्दै भने, “आगामी दिनमा केनाइन सेवालाई थप प्रभावकारी बनाउन व्यावसायिक जनशक्ति र भौतिक स्रोत साधनयुक्त बनाउँदै लैजानुपर्नेछ।”
कार्यक्रममा कर्मचारी र प्रहरी कुकुरहरूले पुष्प वर्षा, आज्ञापालन, बाधा पार र दौड प्रतियोगिता लगायत मनोरञ्जनात्मक प्रदर्शनी प्रस्तुत गरेका थिए। प्राविधिक प्रहरी नायव उपरीक्षक डा. चेत नारायण ज्ञवालीले स्वागत मन्तव्य व्यक्त गर्नुभएको थियो भने प्राविधिक प्रहरी निरीक्षक कृष्ण बहादुर बस्नेतले धन्यवाद मन्तव्य व्यक्त गर्नुभएको थियो।
नेपाल प्रहरीले विगत लामो समयदेखि अपराध अनुसन्धान र खोज कार्यमा तालिम प्राप्त कुकुरहरूको प्रयोग गर्दै आएको छ। कार्यक्रममा प्रहरी अधिकृत, जवान, संचारकर्मी तथा आमन्त्रित अतिथिहरूको पनि उपस्थिति रहेको थियो।
तस्बिरः नेपाल प्रहरी
