काठमाडौं । नेपाली कांग्रेसले पार्टीका पूर्व केन्द्रीय सदस्य आमोदप्रसाद उपाध्यायको निधनमा भोलि पार्टीका सबै कार्यालय बन्द गर्ने निर्णय गरेको छ।
केन्द्रीय कार्यसमितिको सोमबार बिहान बसेको आकस्मिक बैठकले मंसिर २९, पुस १ र २ गते पार्टीका केन्द्रीय, प्रदेश तथा जिल्ला कार्यालयहरूमा झण्डा आधा झुकाउने निर्णय गरेको केन्द्रीय कार्यालयका मुख्यसचिव कृष्णप्रसाद पौडेलले जानकारी दिए। बैठकले स्वर्गारोहणको १३ औँ दिनमा मोरङमा शोक सभा आयोजना गर्ने र सो अवधिभर शोक पुस्तिका राख्ने निर्णय समेत गरेको छ।
अमोदप्रसाद उपाध्याय ९१ वर्षको उमेरमा क्यान्सर रोगका कारण काठमाडौंस्थित ह्याम्स अस्पतालमा मंसिर २७ गते शनिबार निधन भएका थिए। बैठकले उनको आत्माको चिर शान्तिको कामना गर्दै परिवार र आफन्तप्रति समवेदना व्यक्त गरेको छ।
उपाध्यायले २०४८ मा राष्ट्रियसभामा मनोनयन पाएका थिए भने २०५६ मा मोरङ–१ बाट प्रतिनिधिसभा सदस्य पदमा निर्वाचित भएका थिए। २०५६ मा शिक्षा तथा खेलकुद मन्त्री बनेका उनले २०६२र६३ को ऐतिहासिक जनआन्दोलनपश्चात् पुनर्स्थापित व्यवस्थापिका संसद्को सदस्य र २०६४ मा संविधानसभा सदस्यमा निर्वाचित भएका थिए। २०६९ मा उनी पार्टीको केन्द्रीय अनुशासन समितिको संयोजक पनि बनेका थिए।
पार्टीले उपाध्यायको योगदानलाई सम्झिँदै उनलाई श्रद्धाञ्जली अर्पण गर्ने र शोक सन्तप्त परिवारप्रति समर्थन जनाउने योजना बनाएको छ।
