काठमाडौं । मातृभूमि जागरण अभियानका संयोजक भीम रावल र नेपाली कम्युनिष्ट पार्टीबीच आज एकता भएको छ। पेरिसडाँडामा दिउँसो ७ बुँदे सहमति पत्रमा हस्ताक्षर भएको हो।
सहमति अनुसार, आजै राष्ट्रिय सभागृहमा आयोजना गरिएको ‘बृहत् पार्टी समायोजन कार्यक्रम’ मार्फत रावल आफ्नो अभियान नेपाली कम्युनिष्ट पार्टीमा समाहित हुनेछन्।
सहमति पत्रमा राष्ट्रिय स्वाधीनता, अखण्डता र स्वाभिमानको रक्षा गर्दै देशलाई सवल र जनतालाई समृद्ध बनाउनु पर्ने लक्ष्य उल्लेख गरिएको छ।
साथै, आगामी ६ महिनाभित्र एकता राष्ट्रिय महाधिवेशन गर्ने र रावलको जिम्मेवारी लगायतका अन्य विषयमा आपसी सहमतिबाट निर्णय लिने पनि सहमति पत्रमा उल्लेख छ।
के छ ७ बुँदे पत्रमा ?
- (१) नेपाल र नेपाली जनताको सर्वोपरी हित, राष्ट्रिय सार्वभौमिकता, एकता, स्वाधीनता, अखण्डता, स्वाभिमान तथा आत्मनिर्णयको अधिकारलाई अक्षुण्ण राख्दै वाह्य हस्तक्षेप र दवावबाट मुक्त राजनीति, राष्ट्रिय अर्थतन्त्र एवं संस्कृतिको मार्गमा अग्रसर रहने ।
- (२) समाजवाद एवं सामाजिक न्यायको मान्यतामा आधारित आर्थिक-सामाजिक रुपान्तरण र समृद्धिको लागि कटिबद्ध रहने ।
- (३) आगामी ६ महिना भित्र एकता राष्ट्रिय महाधिवेशन गर्ने । महाधिवेशनको मिति र स्थान सचिवालयले यथाशीघ्र निर्धारण गर्ने । सबै तहमा र मातृभूमि जागरण अभियान, नेपाल अन्तर्गत विभिन्न तहमा क्रियाशील व्यक्तिहरुलाई नेपाली कम्युनिष्ट पार्टीको सोही तहमा पारस्परिक सहमतिले समायोजन गर्ने ।
- (४) नेपाली कम्युनिष्ट पार्टीमा मातृभूमी जागरण अभियान, नेपालका संयोजक डा. भीम रावलको जिम्मेवारी लगायतका विषयमा आपसी सहमतिबाट टुंगो लगाउने ।
- (५) पार्टी विधान, राजनीतिक प्रतिवेदन र कार्यक्रम लगायतका दस्तावेजहरु आपसमा मिलेर तयारगर्ने ।
- (६) पार्टीको सञ्चालन विधान, विधि पद्धति र लोकतान्त्रिक मान्यताको आधारमा गरिने । सामूहिक नेतृत्व र जनवादी केन्द्रीयताको अनुशरण गरिने ।
- (७) पार्टी एकीकरणको लागि विभिन्न तहमा आवश्यकता अनुसार कार्यदल गठन गर्ने ।
