काठमाडौं । नेपाली कम्युनिस्ट पार्टीका नेता भीम रावलले तत्कालीन नेपाल कम्युनिस्ट पार्टी (एमाले)का अध्यक्ष केपी शर्मा ओलीलाई धाराशाही भएको आरोप लगाएका छन्।
नेपाली कम्युनिस्ट पार्टीमा समाहित भएर सभालाई सम्बोधन गर्दै रावलले भने, “कम्युनिस्ट पार्टी त बनाएकै थियौं। केपी ओली दुई तिहाइको बहुमतको प्रधानमन्त्री र पार्टीको अध्यक्ष हुनुहुन्थ्यो। मलाई लागेको थियो अब देश समृद्धितिर जानेछ। तर, दुई तिहाइ बहुमत भएको प्रधानमन्त्रीले प्रतिनिधिसभा विघटन गरे। सर्वोच्चले संविधानविपरीत भएको निर्णय सुनायो। त्यो समयमा प्रधानन्यायाधीश उहाँकै निकट रहेको सुनेको थिएँ।”
उनले थपे, “सर्वोच्चको आदेश नमानेर फेरि संसद् विघटन गर्नु भयो। यस हिसाबले बस्तु र तथ्यलाई मान्य बनाउने हो भने, गद्दारीमा केपी ओली भन्दा अरु कोही छैन। नेकपालाई केपी ओली भन्ने झापा निवासीले धाराशाही पारिदिए।”
रावलले आफ्नो पार्टीको योजना पनि प्रस्तुत गर्दै एमालेमा रहेका कम्युनिस्ट आन्दोलनका नेताहरूलाई नेपाली कम्युनिस्ट पार्टीमा एकत्रित गर्ने इच्छा व्यक्त गरे।
